 Шаноўныя браты ў Святарстве, Духоўныя дарадчыкі суполак Маці Божай!
Вялікі Чацвер – гэта той дзень, у які наш Пан Езус Хрыстус, пад час Апошняй Вячэры заснаваў сакрамант Эўхарыстыі і сакрамант Святарства. Заснаваў сакрамант Святарства, каб паклікаць Апосталаў і іх паслядоўнікаў да прадаўжэння Яго святарскай функцыі. Вартасць святарства вельмі велізарная і высокая, бо Святар з'яўляецца "другім Хрыстом" (alter Christi) на зямлі, з'яўляецца распарадчыкам Божай ласкі і Божых таямніцаў і з'яўляецца Пасрэднікам паміж Богам і людзьмі.
Хачу падзякаваць Вам, дарагія браты, за Вашае сведчанне веры, за Вашу паслугу духоўных дарадчыкаў. Дзякуючы Вашаму святарскаму служэнню, шматлікія Божыя дары і ласкі атрымліваюць сем’і нашага руху.
Жадаю Вам, дарагія браты, здароўя, шчасця, добразычлівых людзей і рэалізацыі асабістых жаданняў! Няхай наш Пан і Збаўца благаслаўляе Вас і адорвае сваімі ласкамі, каб Вы і далей ішлі выбраным праз сябе шляхам служэння Богу і людзям! Няхай Уваскрослы Хрыстус падтрымлівае і ўмацоўвае Вас!
духоўны дарадчык сектара
кс. Андрэй Сіповіч
 25 сакавіка 2012 года адбылася чарговая сустрэча сужэнстваў руха “EQUIPES NOTRE – DAME” з парафіі Святога Зыгмунда ў Баранавічах. На сустрэчы прысутнічаў ксёндз Андрэй Сіповіч, ксёндз Валянцін Ляўковіч, сем’і Экіпы Сектара Ляшковіч і Шкраба. Пад час сустрэчы былі разгледзены пытанні сямейнага жыцця маладых пар з Баранавіч, правядзення 12 мая Дня Скупення ў парафіі. На гэту ўрачыстасць запрашаюцца ўсе ўдзельнікі “EQUIPES NOTRE – DAME”, святары і новыя сем’і з парафіі Святога Зыгмунда. У праграме: Святая Імша ў інтэнцыях сямей, канферэнцыя, сведчанні сямей, абед, дыскусія ў групах, Адарацыя Найсвяцейшага Сакрамэнту.
Пачатак мерапрыемстваў 12 мая ў 10.00.
Запрашаем усіх жадаючых на Дзень Скупення.
Сем’і “EQUIPES NOTRE – DAME”
Чым большая любоў да Бога, тым больш узрастае любоў да бліжняга.
25 сакавіка 2012 года адбылася чарговая сустрэча сужэнстваў Экіпы №2. Пачалася сустрэча з малітвы. Мела месца і малітва ў асабістых інтэнцыях. Былі разгледжаны пытанні запаведзі любові, яе сведчанні ў нашым асяроддзі. Таксама была магчымасць выказацца сем’ям у адносінах узрастання веры. Мелі месца змястоўныя словы ксяндза Адама наконт будавання адносін дома, на працы.
 23 сакавіка 2012 года, пад час рэкалекцый у парафіі Божага Цела ў Нясвіжы, сем’і руха “EQUIPES NOTRE – DAME” разважалі над Крыжовым шляхам Збаўцы.
У разважаннях над чатырнаццаццю стацыямі шляху сужэнствы маліліся за сваіх дзяцей.
Няхай гэты Крыжовы шлях дапаможа нам, бацькам і дзецям, мужна, нягледзячы на жыццёвыя цяжкасці, ісці за крыжом Пана, бо ў Ім - наша надзея і збаўленне.
"....Сёння перад жанчынаю адкрываюцца новыя магчымасці больш глыбокага зразумення і больш поўнай рэалізацыі чалавечых і хрысціянскіх каштоўнасцяў, неад’емных ад сужэнскага жыцця і мацярынства; яе інтэлігентнасць, любоў і рашучасць могуць схіліць мужчыну — мужа і бацьку — перамагчы звычку да пастаяннай альбо амаль пастаяннай непрысутнасці, больш таго, могуць давесці да ўзнікнення паміж імі новых адносін міжасабовай камуніі...."
Апостальская Адгартацыя "Christifideles laici"
У паслясінадальнай Апостальскай Адгартацыі Святога Айца Яна Паўла ІІ «Christifideles laici» аб пакліканні і місіі свецкіх у Касцёле і ў свеце дваццаць гадоў пасля Другога Ватыканскага Сабору (1988 г.) Айцы Сіноду, між іншым, прысвяцілі ўвагу сітуацыі і ролі жанчыны. Іерархі імнкуліся прызнаць і пацвердзіць важкі і незаменны ўклад жанчыны ў будаванне Касцёла і ў развіццё грамадства, а таксама дакладна прааналізаваць удзел жанчыны ў жыцці і місіі Касцёла.
Дарагія нашыя жанчыны! Віншую Вас з нагоды Міжнароднага Свята 8 сакавіка! Няхай тыя цёплыя словы, тая любоў і дабрыня, якую Вы адчуваеце сёння ад сваіх блізкіх, стане яшчэ адным выразам удзячнасці для Вас. Жадаю усяго найлепшага у гэты, сапраўды цудоўны і прыгожы дзень, і даручаю Вас і Вашыя сем’і апецы Багародзіцы Марыі, нашай нябеснай Маці!
Кс. Андрэй
 25 лютага адбылася сустрэча суполкі №3 п.Гарадзея, тэмай каторай была “Жыццё як пакліканне“. На чале з ксяндзом Андрэем былі абмеркаваны асноўныя думкі і пытанні тэмы. Кожная справа пачынаецца з малітвы... Малітва дапамагае знайсці сябе, свае магчымасці, знайсці дарогу да Бога, быць пакліканымі, быць “апосталамі” Божага Слова. Сужэнствы павінны сваімі справамі, сваім жыццём, сваімі ўчынкамі паказваць дарогу да Бога іншым сем’ям.
Прыналежнасць да суполкі абавязвае да актыўнага ўдзелу ў жыцці Касцёла. Як гэта здзейсніць практычна? Адным з пунктаў гэтага ўдзелу было прапанавана ў перадсвяточныя дні Пасхі арганізаваць у Касцеле чуванні каля гробу Езуса Хрыста сужэнскімі парамі нашай суполкі г. п. Гарадзея.
Адбылася ўрачыстая сустрэча Экіпы
25 лютага 2012 года, у Дзень 73-яй гадавіны з нагоды самай першай сустрэчы ўдзельнікіаў руху “EQUIPES NOTRE – DAME” у Францыі, адбылося спатканне нашай Экіпы. Гэта сустрэча была адметнай і таму, што на ёй прысутнічаў ксёндз Адам. Для святара гэта было першае спатканне з беларускімі сем’ямі. На сустрэчы прысутнічала таксама новая пара – Кацярына і Аляксандр.
Сустрэча была змястоўнай і цікавай. На спатканні было месца знаёмству, аповеду пра рух “EQUIPES NOTRE – DAME” у Беларусі і ва ўсім свеце, супольнай малітве. Разглядаліся такія важныя пытанні, як умацаванне веры ў сям’і, адкліканне сужонкаў на патрэбы Касцёла. Мела месца таксама разважанне над галоўнай запаведдзю Езуса Хрыста.
|
