2 студзеня 2014 года ў Лагойску, адбылося аплатковае спатканне руху Equipes Notre-Dame. Каб паяднацца і праславіць нашага Пана, у Лагойск з'ехаліся сем'і руху з розных куткоў нашай краіны, таксама былі запрошаны і сем'і, якія яшчэ не належаць да руху. Парадавалі сваёй прысутнасцю і шэсць духоўных дарадчыкаў руху, а таксама сестры законныя з Нясвіжу. А яшчэ на наша свята завітаў хор "Чырвоныя макі" з Мінску з цудоўнымі калядкамі.
Гасцей вельмі сардэчна спаткалі арганізатары спаткання (сем'і з дзьвух суполак г. Лагойска на чале з парай экіпы сектара Валянцінай і Уладзімірам Паплёўкамі і пробашчам айцом Тамашам Маліноўскім MSF).
Сустрэча распачалася Святой Імшой у інтэнцыі руху Equipes Notre-Dame, якую ўзначаліў духоўны дарадчык руху на Беларусі кс. Андрэй Сіповіч. Пасля ўдзелу ў Святой Ахвяры, адбылося святочнае спатканне.
Выслухаўшы ўрывак з Евангелля аб нараджэнні Збаўцы, усе дзяліліся аплаткам складаючы найлепшыя пажаданні. Арганізатары забяспечылі забаўляльную праграму: хор "Чырвоныя макі" спяваў калядкі, праводзіліся розныя конкурсы для дзяцей і дарослых, дзе кожны атрымаў прыз. Ну і, канешне, не абышлося без святочнага пачастунка. Хвала Пану!
